သံဃာအား ဘုရားမဆန်သာ
သံဃာအများစု၏ အလိုကို မြတ်စွာဘုရားသော်မှ လွန်ဆန်၍ မပြုသာသကဲ့သို့ ဦးစီးခေါင်းဆောင် ပြုသူသည် အများစု၏ ဆန္ဒကို မလွန်ဆန်သာချေ။
မြတ်စွာဘုရား ဇေတဝန်ကျောင်း၌ သီတင်းသုံး နေတော်မူစဉ် ကောသမ္ဗီပြည်၊ ဃောသိတာရုံ ကျောင်းရှိ ဝိနည်းဓိုရ် ရဟန်းနှင့် ဓမ္မကထိက ရဟန်းနှစ်ပါးတို့ ဝိနည်းကိစ္စနှင့် ပတ်သက်၍ အငြင်းပွား ရာမှ ရဟန်းများ အချင်းများကြသည်။ မြတ်စွာဘုရားက အချင်းမများကြရန် အဖန်ဖန် ဆုံးမတော်မူ သော်လည်း ရဟန်းများက မနာယူကြသဖြင့် မြတ်စွာဘုရားသည် ပါလိလေယျတောသို့ တစ်ပါးတည်း ကြွသွားတော်မူပြီး ပါလိလေယျ ဆင်မင်း၏ အလုပ်အကျွေးကို ခံယူတော်မူလျက် သီတင်းသုံးနေ တော်မူသည်။ ထိုအကြောင်းကို ကောသမ္ဗီပြည် ဒါယကာ၊ ဒါယိကာမများ ကြားသိ၍ ဃောသိတာရုံ ကျောင်းရှိ ရဟန်းများအား ဆည်းကပ်လှူဒါန်းခြင်း မပြုဘဲ နေကြကုန်၏။ ထိုရဟန်းတို့သည် ဝါတွင်း သုံးလပတ်လုံး ဆင်းရဲစွာ နေကြရကုန်၏။ ထိုအခါမှ မြတ်စွာဘုရား၏ ဂုဏ်ကျေးဇူးကို အောက်မေ့ လျက် နောင်တကြီးစွာရပြီး အချင်းချင်း ပြန်လည်သင့်မြတ် ကြကုန်၏။ ထိုအကြောင်းကို ရှင်အာနန္ဒာ သိလျှင် အခြံအရံရဟန်းငါးရာနှင့်အတူ ပါလိလေယျတောသို့ ကြွသွား၍ မြတ်စွာဘုရားအား ဇေတဝန် ကျောင်းတော်သို့ ပြန်လည်ကြွမြန်းပါရန် ပင့်လျှောက်၏။ မြတ်စွာဘုရားသည် ညီတော်အာနန္ဒာ အမှူး ပြုသော သံဃာတော်များ၏ ဆန္ဒကို လိုက်လျော၍ ပါလိလေယျတောမှ သာဝတ္ထိပြည် ဇေတဝန် ကျောင်းတော်သို့ ပြန်ကြွတော်မူသည်။ ထိုအကြောင်းကို ကောသမ္ဗီ ရဟန်းများ ကြားသိလေလျှင် သာဝတ္ထိပြည်သို့ သွား၍ မြတ်စွာဘုရားအား အလွန်ကျိုးနွံရိုသေစွာ ကန်တော့ကြပြီး မြတ်စွာဘုရား၏ အဆုံးအမကို ခံယူကြလေသည်။ ဤသို့လျှင် မြတ်စွာဘုရားသည်ပင် သံဃာတို့၏ ဆန္ဒကို မလွန်ဆန် သာဘဲ လိုက်လျောတော် မူခဲ့လေသည်။
No comments:
Post a Comment