မျောက်သားစားချင် မျောက်မျက်နှာကြည့်
မျောက်သားစားလိုစိတ် ဖြစ်ပေါ်စေကာမူ မျောက်၏သနားစရာ မျက်နှာကို ကြည့်ရှု၍ ငဲ့ညှာသင့် သကဲ့သို့ တစ်စုံတစ်ယောက်အပေါ်၌ ရက်စက်လိုစိတ် ဖြစ်ပေါ်စေကာမူ တစ်ချိန်က ထိုသူ၏ ကောင်း ခဲ့ဖူးသော အချက်များကိုငဲ့၍ ထောက်ထားသင့်သည်။
မျောက်သားစားချင် မျောက်မျက်နှာမကြည့်နှင့် - နှင့် နှိုင်းယှဉ်။
ရှေးသရောအခါ ပုဏ္ဏားတစ်ဦးသည် ဟိမဝန္တာတောဝယ် မျက်စိလည်လျက် ခုနစ်ရက်လုံး အစာ မစားရဘဲ ချောက်ကြီးထဲ၌ ဒုက္ခရောက်နေ၏။ ဆယ်ရက်ခန့် ကြာသော် ဘုရားလောင်း မျောက်မင်း သည် ပုဏ္ဏားကိုမြင်၍ ၎င်းကို ကျော၌ပိုးပြီး ချောက်တွင်းမှ ပင်ပန်းကြီးစွာ ခုန်တက်ကာ ကယ်တင် ခဲ့လေသည်။ ထို့နောက် ပုဏ္ဏားကို ကျောက်ဖျာငယ် တစ်ခု၌ထား၍ ပင်ပန်းသဖြင့် ခဏမျှ အိပ်စက် လေ၏။ ပုဏ္ဏားသည် မိမိကို ကယ်ခဲ့သော မျောက်မင်း၏ မျက်နှာကို ကြည့်ရှု ထောက်ထားရမည် ဖြစ်ပါလျက် မထောက်ထားဘဲ မျောက်သား စားရန် ရည်ရွယ်၍ မျောက်၏ ဦးခေါင်းကို ကျောက်တုံး ဖြင့် ထုသတ်လေ၏။ မျောက်မင်းသည် ဒဏ်ရာကြီးစွာရ၍ သစ်ပင်ပေါ်သို့ ခုန်တက်ကာ သစ်ပင်ပေါ်မှ လမ်းပြလျက် ပုဏ္ဏားကို တောအုပ်မှ ထုတ်ဆောင်ခဲ့သည်။ ပုဏ္ဏားသည် ကျေးဇူးရှင်ကို ပြစ်မှားသဖြင့် နူ၍ ပြိတ္တာ ဖြစ်သွားလေသည်။
No comments:
Post a Comment