ယောက်မ ခါးထိုးရှာ
ယောက်မကိုခါး၌ ထိုးထားပြီး လိုက်ရှာသကဲ့သို့ မိမိ၏ အနီးအပါးတွင် ရှိနေလျက် သတိမမူမိဘဲ ခက်ခက်ခဲခဲ ရှာဖွေသည်။
ရှေးအခါက မင်းသားတစ်ပါးသည် တောကစားထွက်ရာ သစ်ပင်ကြီးတစ်ပင်အောက်ရှိ ခြတောင် ပို့အနီးသို့ ရောက်လေသည်။ ထိုစဉ် ငိုသံကြားသဖြင့် ရှာဖွေရာ လူကိုမမြင်ရဘဲ ခြတောင်ပို့ကြီးထဲမှ ထွက်နေသည့် ဆံပင်များကို မြင်သဖြင့် ခြေမနှင့်ညှပ်၍ ဆွဲယူလိုက်ရာ ငိုနေသော မိန်းကလေး တစ် ယောက် ပေါ်လာလေသည်။ မိန်းကလေးသည် သူ၏ဆံပင်ကို ခြေမနှင့်ဆွဲယူသော မင်းသားလေး အပေါ်စိတ်ဆိုးကာ စကားမပြောဘဲ နေလေသည်။ မင်းသားလေးသည် မိန်းကလေးအား နန်းတော်သို့ ခေါ်ဆောင်သွားပြီး စကားပြောလာစေရန် ရည်ရွယ်လျက် မင်းသားလေး ကိုယ်တိုင် မီးဖိုဆောင်သို့ ဝင်ကာ ထမင်းအိုးတည်သည်။ မင်းသားကလေးသည် လက်နှီးကို ခေါင်းမှာပတ်၊ စလောင်းဖုံးကို ခေါင်းပေါ်ဆောင်း၊ ယောက်မကို ခါးကြားထိုး၍ ထားလေသည်။ ထမင်းအိုးဆူလာသောအခါ မွှေစရာ ယောက်မကို ဟိုဟို သည်သည် ရှာဖွေနေရာ မိန်းကလေးက မနေနိုင် တော့ဘဲ "ခါးက ဘာတုံး" ဟု ပြောမိလေသည်။ တစ်ဖန် လက်နှီး၊ စလောင်းဖုံး တို့ကို ရှာပြန်ရာ မိန်းကလေးက ထိုနည်းတူ ပြောမိ လေရာ စကားသုံးခွန်း ပြည့်အောင် ပြောမိသွားလေသည်။
No comments:
Post a Comment