မြန်မာစကားပုံနှင့် ဆိုရိုးစကားများ

      ဟင်္သာအချင်းချင်း ပြန်စား၍ ဟင်္သာကိုးသောင်း ပျက်စီးသကဲ့သို့ မိမိတို့ အချင်းချင်း သစ္စာမဲ့၍ အားလုံး ပျက်စီးရသည်။

      ရှေးအခါက စိတ္တကုဋ်တောင် ရွှေဂူကြီးတစ်ခုအတွင်းတွင် ဟင်္သာကိုးသောင်းတို့ ခိုအောင်း နေထိုင် ကြသည်။ မိုးကာလတွင် အပြင်သို့မထွက်ဘဲ နွေအခါက သိုမှီးထားသည့် အစားအစာများကိုသာ စား ၍ နေထိုင်ကြသည်။ ထိုအခါ လှည်းဘီးခန့် ရှိသော ပင့်ကူကြီး တစ်ကောင်သည် ဂူဝတွင် အမြှေးကွန် ရက် ဖွဲ့၍နေ၏။ ဟင်္သာတို့သည် ထိုကွန်ရက်ကို ဖောက်ရန် သန်စွမ်းသော ဟင်္သာပျိုတစ်ကောင်အား အစာကို နှစ်ဆ ကျွေးထား၏။ မိုးစဲသော် ဟင်္သာပျိုဦးဆောင်သော ဟင်္သာများသည် ပင့်ကူမြှေးကို ဖောက်ထွက်၍ သွားကြ၏။ တစ်ခါသော် ငါးလပတ်လုံး မိုးရွာ၏။ ဟင်္သာတို့ အစာကုန်သော် အချင်း ချင်း တိုင်ပင်၍ ဦးစွာ ဟင်္သာဥတို့ကို စားကြ၏။ နောက်မှ ဟင်္သာငယ်တို့ကို လည်းကောင်း၊ ဟင်္သာအို တို့ကို လည်းကောင်း စားကြ၏။ ငါးလလွန်၍ မိုးစဲသော် ပင့်ကူသည် အမြှေးကွန်ရက် ငါးခု ဖွဲ့ပြီး၏။ ဟင်္သာတို့သည် မိမိတို့ ဇာတ်တူသားကို စားကြသဖြင့် ခွန်အား နည်းလေ၏။ အစာနှစ်ဆ စားရသော ဟင်္သာပျို ဦးဆောင်၍ ပင့်ကူမြှေးကို ရှေးနည်းတူ ဖောက်ရာ ငါးခုမြောက်သော ပင့်ကူကွန်ရက်၌ ငြိ၍ အသက်ဆုံးကြရ၏။ ဤသို့ဖြင့် ဟင်္သာကိုးသောင်း ပျက်စီးရသည်။