ထွေးပြီးသားတံတွေး ပြန်မျိုရိုးမရှိ
ထွေးပြီးသား တံတွေးကို ပြန်မျိုရိုးမရှိသကဲ့သို့ ပေးပြီးသား ကတိကို ပြန်ရုပ်သိမ်း ရရိုးမရှိ။
ထွက်ပြီးသော ဆင်စွယ် ဝင်တယ်လို့မရှိ - နှင့် အတူတူ။
ဗာရာဏသီပြည် ဗြဟ္မဒတ်မင်း လက်ထက် ဘုရားလောင်းသည် အဆိပ်ဖြေတတ်သည့် ဆေး ဆရာ ဖြစ်၏။ တစ်နေ့သ၌ မြွေကိုက်ခံရသည့် ရွာသားတစ်ဦးကို ဆွေမျိုးများက ဆေးဆရာထံ ခေါ် လာသည်။ ဆေးဆရာသည် မြွေကိုခေါ်၍ အဆိပ်ကို ပြန်အစုပ်ခိုင်းရာ မြွေက "ငါသည် တစ်ကြိမ် ထုတ်စွန့်ပြီးသည့် အဆိပ်ကို တစ်ဖန်ပြန်၍ စုပ်ရိုးမရှိ" ဟု ပြောလေသည်။ ထိုအခါ ဆေးဆရာသည် မီးဖိုစေ၍ "အဆိပ်ကို ပြန်မစုပ်လျှင် မီးပုံထဲသို့ ဆင်းလော့" ဟု ဆိုသည်။ မြွေသည် "မီးပုံထဲ သို့သာ ဆင်းမည် အဆိပ်ကိုကား မစုပ်နိုင်" ဟု ဆိုကာ မီးပုံထဲသို့ ဆင်းမည် ပြုလေသည်။ ဆေးဆရာက မြွေအား မီးပုံထဲ မဆင်းစေဘဲ ဤနေ့မှစ၍ သူတစ်ပါးအား မညှဉ်းဆဲရန် ဆုံးမပြီး ပြန်လွှတ်လိုက် လေသည်။ မြွေကိုက်ခံရသူအားလည်း ဆေးကုသပေးလေသည်။
No comments:
Post a Comment